വെബ് 3 യിലേക്കുള്ള മാറ്റം വർദ്ധിച്ചുകൊണ്ടിരിക്കുന്നതിനാൽ, വാലറ്റുകളുടെ അടിസ്ഥാന സൗകര്യങ്ങൾ മെച്ചപ്പെടുത്തേണ്ടതുണ്ട്. എംപിസി, സീഡ്‌ലെസ് വാലറ്റുകൾ എന്നിവ പോലുള്ള പുതിയ, സുരക്ഷ വർദ്ധിപ്പിച്ച മാർഗങ്ങൾ ജനപ്രീതി നേടുന്നുണ്ട്. ഇവ ഒരാളുടെ ക്രിപ്റ്റോ, എൻ‌എഫ്‌ടി ഹോൾഡിംഗുകൾ സൂക്ഷിച്ചു വെയ്ക്കുന്നത് ലളിതവും സുരക്ഷിതവുമാക്കും.
ഡി ആപ്പുകളുമായി ബന്ധപ്പെട്ട എല്ലാ പ്രവർത്തനങ്ങളും വാലറ്റുമായി ബന്ധപ്പെട്ടിരിക്കുന്നതിനാൽ വാലറ്റുകൾ വെബ് 3 ലോകത്തെ ഒരു പ്രധാന ആവശ്യമാണ്. ക്രിപ്റ്റോ കറൻസികളും എൻഎഫ്‌ടികളും വാലറ്റുകളുമായി ബന്ധിപ്പിച്ചിരിക്കുന്നതിനാൽ, വെബ് 3യിലെ ഹാക്കർമാർക്കും സ്‌കാമർമാർക്കും ഇടയിൽ വാലറ്റ് വിവരങ്ങൾ ചൂഷണം ചെയ്യുന്നത് ഒരു സാധാരണ രീതിയായി മാറിയിരിക്കുന്നു. പലപ്പോഴും, ഫിഷിംഗ് വഴി ഏതെങ്കിലും അപ്പ്രൂവൽ വഴിയോ അല്ലെങ്കിൽ പാസ്‌വേഡ് മറന്നു പോയതിനാലോ വാലറ്റ് നഷ്‌ടപ്പെടാറുണ്ട്.
വെബ് 3യുടെ വിശാല ലോകത്തേക്ക് എത്തുന്നതിന് മുൻപ്, വാലറ്റ് സാങ്കേതികവിദ്യയും സുരക്ഷയും വികസിക്കേണ്ടതുണ്ട്. എഫ്‌ടിഎക്‌സിന്റെ തകർച്ചയ്ക്ക് ശേഷം, ടോക്കണുകൾ സ്വയം സൂക്ഷിക്കുക എന്ന ആശയം ക്രിപ്റ്റോ ലോകത്തെ ചർച്ചാവിഷയമായി കഴിഞ്ഞു. കേന്ദ്രീകൃത സേവനങ്ങളിൽ നിന്നും വാലറ്റുകളിലേക്കും പ്രത്യേകിച്ച് ഹാർഡ്‌വെയർ വാലറ്റുകളിലേക്കും ഫണ്ട് മാറ്റാൻ കൂടുതൽ വ്യക്തികളെ പ്രേരിപ്പിക്കുന്നു. എന്തുകൊണ്ടാണ് വ്യക്തികൾ ഹാർഡ്‌വെയർ വാലറ്റുകൾ തിരഞ്ഞെടുക്കുന്നത്?ഹാർഡ്‌വെയർ വാലറ്റുകൾ ഏറ്റവും സുരക്ഷിതമായ ഓപ്ഷനാണോ? എന്നിങ്ങനെയുള്ള സംശയങ്ങളും ഉണ്ടാവാം.
നിങ്ങളുടെ എല്ലാ ക്രിപ്‌റ്റോകറൻസികളിലേക്കും എൻഎഫ്ടികളിലേക്കും ആക്‌സസ് അനുവദിക്കുന്ന സുരക്ഷിതമായി സൂക്ഷിച്ചു വെയ്ക്കുന്നതിനും നിയന്ത്രിക്കുന്നതിനുമുള്ള ഉപകരണങ്ങളാണ് ഹാർഡ്‌വെയർ വാലറ്റുകൾ. വാലറ്റിന്റെ സ്വകാര്യ കീ, വാലറ്റുമായി ബന്ധപ്പെട്ട ക്രിപ്‌റ്റോകറൻസികൾക്ക് ഉടനടി ആക്‌സസും നിയന്ത്രണവും നൽകുന്ന ഒരു അക്കൗണ്ട് പാസ്‌വേഡായി കണക്കാക്കുന്നു.
ഇന്റർനെറ്റുമായി ബന്ധിപ്പിച്ചിട്ടില്ലാത്തതിനാലാണ് ഹാർഡ്‌വെയർ വാലറ്റുകൾക്ക് മുൻഗണന ലഭിക്കുന്നത്. ഇന്റർനെറ്റ് കണക്റ്റുചെയ്‌ത ഉപകരണമല്ലാത്തതിനാൽ ഓൺലൈനിൽ സംഭവിക്കാനിടയുള്ള ആക്രമണങ്ങൾ കുറയുന്നു. മുമ്പ് സൂചിപ്പിച്ചതുപോലെ, നിങ്ങളുടെ ക്രിപ്‌റ്റോകറൻസികളുടേയും എൻഎഫ്ടികളുടേയും നിയന്ത്രണം നിങ്ങളുടെ സ്വകാര്യ കീയിൽ സുരക്ഷിതമായിരിക്കും. ഹാർഡ്‌വെയർ വാലറ്റുകൾ സജ്ജീകരിക്കുന്ന സമയത്ത്, ഉപകരണത്തിൽ തന്നെ വാലറ്റിന്റെ സ്വകാര്യ കീ സൃഷ്ടിക്കപ്പെടുന്നു. സ്വകാര്യ കീ ജനറേറ്റ് ചെയ്ത് സേവ് ചെയ്യുന്നത് ഓഫ്‌ലൈനിൽ ആയതിനാൽ, മൊബൈലിലോ കമ്പ്യൂട്ടറിലോ സംഭവിക്കാൻ സാധ്യതയുള്ള ഏതെങ്കിലും സ്‌നിഫിംഗ് ആക്രമണങ്ങളിൽ നിന്ന് ഉപയോക്താക്കൾക്ക് പരിരക്ഷ ലഭിക്കുന്നു.
കൂടാതെ, നിങ്ങൾ ഇടപാടുകൾ പൂർത്തിയാക്കുമ്പോൾ ഹാർഡ്‌വെയർ വാലറ്റുകൾ ടു ഫാക്ടർ ഒതന്റിക്കേഷൻ സംവിധാനമായി പ്രവർത്തിക്കുന്നു. സാധാരണ ഇടപാട് നടത്തുമ്പോൾ ഉപയോക്താവ് അയച്ച അസറ്റുകളുടെ വിലാസം പരിശോധിക്കേണ്ടതുണ്ട്. കമ്പ്യൂട്ടറിൽ ഇന്റർനെറ്റ് ബന്ധിപ്പിച്ചിരിക്കുന്നതിനാൽ, ക്ലിപ്പ്ബോർഡ് അറ്റാക്ക് അല്ലെങ്കിൽ സ്‌ക്രീൻ സ്പൂഫിംഗ് പോലുള്ള സൈബർ ആക്രമണങ്ങൾക്ക് വിധേയമാകാം. അവിടെ തെറ്റായ വിവരങ്ങൾ നിങ്ങളുടെ സ്‌ക്രീനിൽ പ്രദർശിപ്പിക്കും.
ഇത്തരം സൈബർ ആക്രമണത്തിൽ, കമ്പ്യൂട്ടറിലോ മൊബൈലിലോ പകർത്തിയ വിവരങ്ങൾക്ക് പകരം തെറ്റായ വിവരങ്ങൾ നൽകുന്നു. ഹാർഡ്‌വെയർ വാലറ്റുകൾ സാധാരണയായി ഒരു മൊബൈൽ അല്ലെങ്കിൽ ഡെസ്‌ക്‌ടോപ്പ് ആപ്ലിക്കേഷനുമായി ഇന്റർഫേസ് ചെയ്തിരിക്കുന്നു. കൂടാതെ ശരിയായ വിലാസം ലഭിക്കുന്നതിനായുള്ള കൃത്യമായ വിവരങ്ങൾ പരിശോധിക്കാൻ കഴിയുന്ന ഒരു സ്‌ക്രീനുമുണ്ട്. അതിനാൽ, ഒരു ഇടപാട് നടത്തുന്നതിന് മുമ്പ് ഉപയോക്താക്കൾക്ക് അവർ എവിടേക്കാണ് ഫണ്ട് അയയ്‌ക്കുന്നത് എന്നതിനെ കുറിച്ച് പരിശോധിക്കാനും നഷ്ടവും മോഷണവും ഒഴിവാക്കാനും കഴിയും.
എല്ലാ വെബ് 3 സ്‌പെയ്‌സിലും എന്ന പോലെ, എംപിസി, സീഡ്‌ലെസ് വാലറ്റുകൾ എന്നിവ അവതരിപ്പിച്ചുകൊണ്ട് വാലറ്റ് സ്‌പെയ്‌സിലും വലിയ കുതിച്ചുചാട്ടങ്ങൾ നടക്കുന്നുണ്ട്. ഫ്രോണ്ടിയർ സാങ്കേതികവിദ്യ മാറ്റിനിർത്തിയാൽ, ഹാർഡ്‌വെയർ വാലറ്റിന്റെ പോരായ്മകൾക്ക് നിലവിലുള്ള ഒരു ജനപ്രിയ പരിഹാരം ഒരു മൾട്ടി-സിഗ്നേച്ചർ വാലറ്റ് (മൾട്ടി-സിഗ്) ഉപയോഗിക്കുക എന്നതാണ്. ഒരു മൾട്ടി-സിഗ് വാലറ്റിൽ, ഒന്നിലധികം വാലറ്റുകൾ ഒരു വിലാസവുമായി ബന്ധപ്പെട്ടിരിക്കുന്നു. കൂടാതെ സിഗനേച്ചറുകളുടെ ഒരു പരിധിയും ഉണ്ടാവും. ഉദാഹരണത്തിന്, ഒരു മൾട്ടി-സിഗ് വാലറ്റിൽ 3 സൈൻ വെയ്ക്കാം. കൂടാതെ ഒരു ഇടപാട് അംഗീകരിക്കുന്നതിന് 2 സിഗനേച്ചറുകൾ ആവശ്യമാണ്.
എല്ലാ ബ്ലോക്ക്‌ചെയിനുകളും ഇന്ന് മൾട്ടി-സിഗിനെ പിന്തുണയ്‌ക്കാത്തതിനാൽ മൾട്ടി-സിഗ് വാലറ്റുകളിലും പ്രശ്‌നമുണ്ട്. കൂടാതെ വ്യത്യസ്ത ബ്ലോക്ക്ചെയിനുകൾക്ക് വ്യത്യസ്ത മൾട്ടി-സിഗ് ഉണ്ട്. കൂടാതെ, മൾട്ടി-സിഗ് വാലറ്റുകളുടെ സങ്കീർണ്ണത കാരണം വ്യക്തിഗത ക്രിപ്റ്റോ നിക്ഷേപകന് അനുയോജ്യവുമല്ല. എന്നിരുന്നാലും, സീഡ്ലെസ്സ് വാലറ്റുകളുടെയും മൾട്ടി-പാർട്ടി കമ്പ്യൂട്ടേഷൻ (എംപിസി) വാലറ്റുകളുടെയും വരവ് മൊത്തത്തിലുള്ള സ്വകാര്യതയും സുരക്ഷയും മെച്ചപ്പെടുത്തുന്നതിൽ കാര്യമായ നേട്ടം കൈവരിച്ചിട്ടുണ്ട്.
